నేరగాడి కులం అడిగి కాల్చమంటారా?: బిహార్ సీఎం సమ్రాట్ చౌదరి

బీహార్‌లో పోలీస్ ఎన్‌కౌంటర్లపై రాజకీయ దుమారం చెలరేగింది. రాష్ట్రంలో కుల ప్రాతిపదికన ఎన్‌కౌంటర్లు జరుగుతున్నాయంటూ ప్రతిపక్ష నేత తేజస్వి యాదవ్ చేసిన ఆరోపణలపై ముఖ్యమంత్రి సమ్రాట్ చౌదరి తీవ్రంగా స్పందించారు. "అంటే, పోలీసులు ముందు నేరగాడి కులం అడిగి, ఆ తర్వాతే కాల్పులు జరపాలా?" అంటూ వ్యంగ్యాస్త్రాలు సంధించారు.

రాష్ట్రంలో నేరగాళ్ల కులాన్ని నిర్ధారించుకున్న తర్వాతే వారిని లక్ష్యంగా చేసుకుంటున్నారని తేజస్వి యాదవ్ ఇటీవల ఆరోపించారు. ఈ నేపథ్యంలో పట్నాలోని పోలీస్ హెడ్‌క్వార్టర్స్‌లో జరిగిన ఒక కార్యక్రమంలో సీఎం సమ్రాట్ చౌదరి ఈ వ్యాఖ్యలు చేశారు. తేజస్వి ఆరోపణల్లో ఇంగితజ్ఞానం లేదని, ఇలాంటి వ్యాఖ్యలకు అర్థం పర్థం లేదని కొట్టిపారేశారు.

హోం శాఖను కూడా నిర్వహిస్తున్న సమ్రాట్ చౌదరి మాట్లాడుతూ "సుపరిపాలన అందించడమే ఎన్డీఏ ప్రభుత్వ ప్రధాన లక్ష్యం. శాంతిభద్రతల విషయంలో రాజీపడే ప్రసక్తే లేదు. పోలీసులకు పూర్తి స్వేచ్ఛ ఇచ్చాం. పోలీసులను ఎవరైనా సవాల్ చేస్తే 48 గంటల్లోగా స్పందించాలని ఆదేశాలు జారీ చేశాం" అని స్పష్టం చేశారు.

రాష్ట్రంలో శాంతిభద్రతలు పటిష్ఠంగా ఉంటేనే పెట్టుబడులు వస్తాయని ఆయన అన్నారు. "ప్రధాని నరేంద్ర మోదీ, మాజీ సీఎం నితీశ్ కుమార్ ఆశీస్సులతో బిహార్ వేగంగా అభివృద్ధి చెందుతోంది. నవంబర్ 20, 2026 నాటికి రాష్ట్రానికి రూ. 5 లక్షల కోట్ల పెట్టుబడులు తీసుకురావాలని లక్ష్యంగా పెట్టుకున్నాం" అని వివరించారు. పోలీసు సిబ్బంది సంక్షేమానికి తమ ప్రభుత్వం కట్టుబడి ఉందని కూడా ఆయన హామీ ఇచ్చారు.

ప్రస్తుతం బిహార్‌లో శాంతిభద్రతల అంశంపై అధికార, ప్రతిపక్షాల మధ్య మాటల యుద్ధం కొనసాగుతోంది. పెరుగుతున్న నేరాలపై ప్రతిపక్షాలు ప్రభుత్వాన్ని లక్ష్యంగా చేసుకుంటుండగా, నేరగాళ్లపై కఠిన చర్యలు తీసుకుంటున్నామని అధికార ఎన్డీఏ కూటమి స్పష్టం చేస్తోంది.